Sjálfstæðismenn splæsa !

Það er svoldið magnað að sjá örvæntingafullar tilraunir Sjálfstæðismanna að bjarga andliti flokksins í þessum kosningum.  Eina slíka tilraun vil ég nefna sérstaklega og er um skuldir heimilanna.

Leið Sjálfstæðismanna er að fresta vandanum og lengja í snörunni.  Skoðum eitt dæmi.

Fjölskylda kaupir íbúð á 21,0 milljónir og með láni upp á 18,0 milljónir með 5,1% vöxtum til 40 ára.  Greiðslubyrgði í upphafi er 89.505.- á mánuði og heildar endurgreiðsla lántakenda eru 40.814.367.-

Með verðbólgu síðasta árið hefur íbúðalánið hækkað um ca 20% og er komið í 20,0 milljónir.  Greiðslubyrgðin er komin upp í 99.442.- og heildar endurgreiðslan er komin í 45.345.500.-  Með þessari verðbólgu og stöðugu íbúðaverði er fjölskyldan búin að tapa 2 af 3 milljónum sem hún lagði í eigið fé við íbúðakaupin.

Aðferð Sjálfstæðismanna er að lækka greiðslubyrgði þessa láns um helming í þrjú ár.  Greiðslubyrgðin verður því 50.000.- í þrjú ár og hækkar svo aftur að þeim tíma í 99.442.- á mánuði.  Þetta kostar hinsvegar að lánið hækkar um 3x12x50.000.- = 1.800.000.-  Þá er lánið komið upp í 21.800.000.- og til að afborganirnar verði aftur 99.442.- á mánuði þarf að lengja lánið úr 40 árum í 55 ár.  Við það hækkar svo aftur heildar endurgreiðsla lántakenda í 65.343.217.-

Tæknilega séð er þessi fjölskylda gjaldþrota eftir þessa meðferð, þ.e. lánin eru orðin hærri en eignir.  Þriggja ára pásan kostar í heild 20 milljónir og 15 ára streð.

Leið okkar Framsóknarmanna er að fella niður þessa verðbólguhækkun síðasta árið og færa þannig greiðslubyrgðina aftur niður í 89.505.- á mánuði.

En eins og ég segi þá eru Sjálfstæðismenn að splæsa.  Þeir eru hins vegar ekki að slæsa neinu á almenning heldur að splæsa bút inn í hengingarkaðalinn.  Fallið verður lengra og kippurinn fastari.

Athugasemdir

[Ingólfur H Þorleifsson, 25.4.2009 kl. 12:51]

Siggi.

Hvernig væri að þú upplýstir okkur fávísa kjósendur aðeins um 90% lánin sem þið Framsóknarmenn komuð á og eru nú helsta ástæðan fyrir því að stór hluti húseigenda af yngri kynslóðinni er að fara á hausinn.

Gleðilegan kjördag.

[Sigurður Jón Hreinsson, 25.4.2009 kl. 15:40]

Sæll Ingólfur.

Sú ákvörðun að taka upp 90% lánin á sínum tíma var ákveðin leiðrétting.  Það má jafnvel líta á það sem jafnréttismál að öllum íbúðakaupendum skyldi bjóðast að taka hlutfallslega jafnhá lán á sömu kjörum.  Áður hafði fólk orðið að brúa bilið með dýrum bankalánum.

Það kapphlaup sem bankarnir fóru svo útí með að bjóða jafngóð eða jafnvel betri lán en Íbúðarlánasjóður var ekki fyrirsjáanlegt, en sýndi kanski frekar hvað bankarnir höfðu verið að okra á almenningi.

Af þessu tilefni er kanski rétt að horfa aðeins til þess hver upptökin að þessari lánsfjárþörf er.  Þegar við hjónin kaupum okkar fyrstu íbúð vorum við þeirrar gæfu aðnjótandi að eiga það mikinn skyldusparnað að geta brúað bilið upp í 65% lán Íbúðarlánasjóðs.  Skyldusparnaður kom þannig ungu fólki alveg sérstaklega vel í þeim tilgangi.  Þess vegna er rétt að minna á það að Sjálfstæðisflokkurinn kom því til leiðar að það kerfi var aflagt.

Þú Ingólfur villt kanski útskýra það betur fyrir okkur.